Mop Papua Part 3

Ko Trada Otakkah ?

 Pace Obed sakit gigi. Di ujung jalan tukang dageng teriak-2, "Dageeeng...! Dageeeng...!" Pace kesal tapi tra bisa apa-2. "Dageeeng...!" Tukang daging su dekat.
Pace keluar rumah kasi panggil tukang dageng, "Ooi..!" Tukang dageng kasi dekat.
Sambil meringis kesal pegang de pu pipi Pace bilang, "Ko tra punya otak kah?!"
"Tra ada Bapa... Kalo daging, tetelan, sa bawa ini..," jawab tukang dageng. "Oooi, ko mau ini kah..!!" Pace keluar rumah sambil kepal tangan ke atas. Tukang dageng kasi lari.

Kirim Surat Tra Tau Balas

Obed, dorang murid SMP yang terkenal nakal, ditegur oleh Ibu Gurunya. Ibu Guru : " Obed, ee kenapa kalamarin ko tara pi masuk skolah ?" Obed : " Sa ada sakit, bu Guru !"
Ibu Guru : " Ah ..... kenapa ko tara kirim surat ?" Obed : " Parcuma saja ! bu Guru tara tau balas...?????" Ibu Guru : " Terdiam ....... melongo ..... hah "

Sa Pu Bapa Yang Paling Cepat

Ada tiga orang anak kecil, dorang pu nama Obed, Markus deng Pilemon. Dorang tiga lagi baku debat tentang sapa pu Bapa yang paling cepat. Markus : "Sa pu Bapa sudah paling cepat . Bapa atlit panah toooo, jadi setelah Bapa de lepas itu panah.
Bapa lari dan bisa sampae lebeh dolo dari pada itu panah. Bagemana, mantap tooo sa pu Bapa ..??" Pilemon : "Ahh, itu su biasa kawan, coba ko dengar ini !! Sa pu Bapa nih seorang pemburu.
Setelah Bapa tembakkan Bapa pu peluru, Bapa de lari dan bisa sampae dolo dari pada itu peluru. Mamaeee..itu sa pu Bapa de pu cepat saja, bagaimana coba ?" Obed : "Alahhhhh. sudah, ko dua pu Bapa maseh kalah cepat deng sa pu Bapa. Sa pu Bapa nih seorang pegawai tooo.
Sa pu Bapa nih pung kantor pulang pukul 5 sore, tetapi de su sampe rumah nih pukul 4. Cepat tooo...!!?" Markus dengan Pilemon baku liat:" Iyooo ko Obed, ko pu Bapa paling cepat yoooo ....
 Cukarbeleng !!!

Kucing Dan Kangkung

Anak 3 anak kecil, dong crita soal sayur kangkung di dong pu kampung masing-masing.
Anak 1 : "Di sa pu kampung tuh, kangkung besar-besar skali, kalop masak beberapa batang saja, pasti makan sampe kenyang," Anak 2 : " Ah, itu kurang, di sa pu kampung, sayur kangkung tuh tikus bisa masuk di dalam," Anak 1 dan 3 heran skali. Giliran anak ke 3, dia tra mau kalah. Anak 3 : "Kalo di sa pu kampung, tikus tra bisa masuk dalam kangkung," Anak 1 dan 2 : "Ah, itu tra hebat, pasti kangkungnya kecil-kecil too," Anak 3: "Sabar dulu, kam tau kenapa tikus tra bisa masuk?" Dong dua diam. Trus anak ke 3 lanjut: "Itu karena di sa pu kampung tuh, dalam kangkung ada kucing,"

Ko Mati Sana

Su 2 hari Tete masuk Rumah Sakit RSU Manokwari kena demam. Sekarang Tete su sehat.
Dokter bilang Tete su boleh minum kopi.
Tete minta kopi sama Suster, "Suster, bolehkah sa minta kopi satu cangkir?" "O, boleh Bapa. Tunggu sebentar e," kata Suster. Tra lama Suster balik sambil kasih de pu kopi ke Tete, "Ini Bapa kopinya."
"Trimakasih e," jawab Tete meringis kepanasan.
Tete ambil obat, trus Tete tetesi ke dalam kopi.
Suster mara, "Bapa, ko kasi apakah ko pu kopi?!" "O, Suster," jawab Tete. " Ko kasih sa kopi panas, jadi sa kasih obat penurun panas toh..?!" Suster ngeloyor pergi sambil ngomel, "Ko mati sana..."

Ko Gilakah

Pace Yaklep masuk Rumah Sakit Jiwa de tanam besi. Terus tiap pagi dan sore de siram. Skali begini ada kunjungan dari bapak bupati ke RSJ, pas pace gila ko ada siram-siram besi yang de tanam.
Bapak bupati lewat terus de bilang : "Sah... subur ee..." Pace Yaklep langsung de balik, baru de bilang : "Bapak bupati ko gila kah? ini besi... hahahahaheee...

Tete Terlambat Ke Pelabuhan

Tete mau berangkat, trus kapal masuk jam 4 subuh, jadi tete bilang sama cucu nanti kasi bangun Tete jam 4, cucu bilang iyo sip.
Dong dua tidur sampe lewat, su jam 5 Tete dia marah cucu, langsung Tete naik ojek ke pelabuhan sampe di sana kapal su jarak 3 meter.
Tete lipat kaki celana, taruh ransel di belakang, siap-siap lompat ke kapal, trus orang-orang di pelabuhan bilang Tete ko GILAKAH…
Tete bilang EPEN kah… langsung Tete lompat ke tangga kapal, Sampe di atas, Satpam bilang Tete SANTAI SAJA…Kapal BARU mau SANDAR…..
Ikut Kabe
Ada Ibu muda martina biak periksa kehamilan di Klinik KB
Dokter : Ibu yang bulan lalu datang periksa KB to…? Ibu : iyaa Dok Dokter : Trus… sekarang ada apa ?
Ibu : Saya hamil lagi dok
Dokter : Loh…Kok Bisa…, Lalu Obat KB nya yang saya kasih di Minum atau tidak? Ibu : Bagaimana tidak hamil Dok, Obat baru sampe di leher, celana kolor su sampe di lutut….!

Nene Pegang Kuat

Ada anak satu de mo antar de pu nene pi berobat ke dokter pake motor. Anak : Nene pegang kuat ee. .
Nene : iyo sip. . nene su pegang kuat nih. . Anak : betul su pegang kuat ka? Nene : iyo sudah nih. . ko nih cerewet skali. Anak : ok sudah. siap tong jalan. .brumm. . Brumm. . anak ko tancap gas dan tiba2 ada bunyii BRUUUKKKKK
Anak ini kaget tra bae punya pas de bale blakang begini, nene ko ada tikam di aspal. langsung dia tanya : Anak : bah.. nene tra pegang kuat kah??
Nene : ahh nene su pegang kuat skali moo Anak : nene pegang di mana tadi kah? Nene : di pagar rumah situ. . .

hehehehe